同事M尋日係msn問我：「我有個friend幫咗我幾大忙，我想多謝佢，英文應該點寫？」

我：「你可以用a million thanks 或者 tons of thanks 都得。」

同事M：「Tons of thanks 即係大幫忙？」

我：「係非常多謝咁的意思啦，都可以用係幫大忙度。下次你再搵人笨幫你忙，就用呢句囉。」

同事M：「哈哈！咁小幫忙係咪 a gram of thanks？」

嘩！舉一反三？佢幾時開始咁有興趣深入研究文字呀？擺明玩嘢啦！

同事M：「我係咪好聰明呢？」

我：「好呀，你咪試吓用 a gram of thanks, 睇吓人地咩反應囉，又唔關我事。」 A gram of thanks? 同封一毫子利是畀人有咩分別？

同事M：「呵呵！幫倒忙係咪：negative of thanks？」佢開始得“戚”忘形。

為防止佢無限申延，我唯有打沉佢：「幫倒忙可以直接用粗口剷佢，唔使再用negative of thanks咁間接。」警告：negative of thanks唔啱文法，而提議佢用粗口只係切合佢的人物性格，其他人兩樣都唔好學。

同事M：「哈哈！人地都未 100% 會肯定幫到你忙，就用 a million of thanks 好似早咗d。」

同事M：「有冇呢句？：if you can help me really and successfully, I will be a million of thanks of your assistance. 起碼最終佢都唔幫我, 我可以收番句 a million of thanks.」

佢呢句係計較、冇禮貌兼唔啱文法的，總之就係錯晒！人地幫唔到佢，就想收番 a million of thanks，咁都畀佢諗到!!!真係畀佢激死，又笑死！

我冇佢咁好氣周旋咁耐：「你真係好鬼死得閒！諗咁多，因住有精神分裂!! 同埋我好忙，唔好搞住晒！」

同事M：「OK. 見你有問有答，咪大家研究下囉。老細放假，我係得閒d架啦。」

原來佢“研究”的定義 = “玩嘢”！？